Quanta vote,
gurdanno nu vriccillo,
a rip’ e mare,
o a fianco a na ciumara,
tunno tunno, ammaccato
o a forma r’ove,
liscio e lucente,
(mànco fusse stato o meglio marmular’ a ll’alliscià)
aggio pensato ca, ncopp’ a sta terra,
pure na preta porta la sua età!
Mo, na pretella giovene,
ardente e ntruppecosa,
tagliente e chien’ ‘e spigule,
ca mo è schiuppata ’a coppa a na muntagna,
quantu tiempo rummane tal’ e quale?
Nu seculo?
Dduje secule?
Ma po’?… Ogge o viento,
rimane na tempesta,
pure na vreccia chiù appuntut’e nziste
s’allisce s’appiattisce
s’allustrea…
Pur’je, quann’ ero giovene,
er’appuntut’ e nziste…
Po’ o tiempo…chianu chianu, m’ha cagnato…
sbattut’a ccà e a llà
na vita sana,
me so’ arrugnato
e po’
me so’ sbiancato
e mò…
e mò?
e… mò…
(1978) Gaetano Lamagna
